Angeschmärt
Von Wilhelm Reichermann
De Adebar de brocht
Tejähr önn Stallupöne
Dem Naujokat e Jung;
Hadd uterdem all eene.
De wör all von fief Jahr
Onn dabie sehr geweckt;
Von sienem kleene Brooder
Wör he nich sehr entzöckt.
E Großvoader wör ook da,
De hadd ömm Muhl kein Tähne,
Ook wör opp sienem Kopp
Kein Haar benoah to söhne.
Bie dem kroop de kleen Grotsähn
Sehr häufig opp e Schoot,
Onn hulp em denn vertähre
Sien Fröhstöcks-Botterbrot.
"Du Ohpapa", sacht leiske
Tom Ohle nu ons Kleener,
"De Brooder hefft kein Tähne!
Wat öss blos dat fer eener!
Ook hefft he opp em Koppke
Nich moal een ihnzget Haar,
So ganz akkroad wie du!
Joa gloow man, dat öss wahr!"
Nu rennt he bie e Voader, -
Opp siene Schoot he bährt, -
"Du, Voader, - met em Brooder
Da sie we angeschmärt
Kein Haar nich opp em Koppke,
Kein Tähn ömm Muhlke bönn, -
Wie mie dat schient, mott dat all
E ganz steenohler sönn!"
Aus: "STARKER TOBBAK"-
Eine Auslese der besten Plattdütschen Spoaskes
aus den 11 Bänden "Ut Noatange".
Gräfe und Unzer Verlag München
zum Gedichtverzeichnis
|