De Ohm ut Broakupöne
Von Toni Schawaller
He weer all äwer siebzig Joahr,
E Kerdel wi e Boom,
Einssechsundachtzig, wittet Hoar,
Dat weer de Derpsche Ohm.
De Derpsche kennde em am Gang,
De Ohm droag Gänserompe,
De weere dreißig Zoll woll lang,
So kunn se keiner pompe.
Käm de Kaunat bi Mellersch hen,
Denn wußt he all: Ons Ohm huckt drön.
De grötste Gänserompe,
Dat sönd dem Ohm sin Klompe.
Far fuffzig Joahr hedd he gedeent
Als Gardekürassier:
"Ju Kräte vonne Önfantrie
Sönd Schaschkes bloß far mi.
Öck hier als Gardekürassier,
Ju denkt, öck loat mi lompe!"
He moak de Derpsche Junges vär
Parademarsch op Klompe.
Huckt eener pucklich oppet Peerd,
Denn deed ons Ohm em jecke.
Denn weer he önnerlich empört
On brukt oft Kraftutdröcke:
"Huckst wi e Knieptang oppe Su,
Warscht kein Gardist nich warre.
Borg di e Rock von jenner Fru,
Moak nich dat Peerd tom Narre.
Kandare fast on Schenkel dran,
E Pankok böst du on keen Mann!
Möcht öck di Lorbaß riede lehre,
Denn kunnst de Engel singe höre."
So deed de Ohm görn renommeere.
Doa wull een Bur em utprobeere,
Of he dat Gardemoaß verdrächt,
De Krät sull hiet sick noch scheneere.
Dem Körl bekoam de Prow recht schlecht.
Biem Grogche leeg de undre Dösch.
"Dat war noch goar nuscht", seggt de Ohm,
sponnüchtre wie e Fösch,
"E oler Gardekürrassier
Drinkt dreißig Grogs on zwanzig Bier."
Fünf Glas goot he noch undre Bind,
Doa sähd Fru Pawel: "Nu verschwind."
Doa ging he öm Paradeschrött
Noa Huus - doch ohne Klompe,
Nehm noch e Halfquarteerke möt,
Verloar de Gänserompe.
He schwankd nich hen, he schwankd nich her,
Käm glöcklich bot am Huusedeer,
On von dem beetke Blubberwoater,
Doa kreech ons Ohm nicht moal dem Koater.
Dem andre Morje Uhre vär
Huckd he sponnüchtre varre Deer,
Äät Schmoltebroot - tom Afgewenne
Leet he e Schnapske runderrenne.
On dit Geschichtke ös passeert
Tohus ön Broakupöne,
Durt wo man titt de beste Peerd,
Dicht biem Gestüt Trakehne.
Quelle: Ruth Maria Wagner "Luntrus und Marjellchen",
erschienen im Verlag Gerhard Rautenberg, Leer
zum Gedichtverzeichnis
|