Min Drom
von Daniel Staschus
Mi heff gedrömt, so ongefähr
Vör etwa säwe Joahre,
Dat öck sogoar gestorwe wör
On sulld begroawe ware.
Dann ös de Engel Gabriel
Öm Nu to mi gekoame
On heft dann mine oarme Seel
Fohrts biem Wischkoll genoame.
On allsogliek he treckte mi
Möt wuchtge Flochteschläge
Ganz senkrecht ön de Höcht - heidi!
Dem helle Licht entgege.
On als wi beide ropgeflötzt
Öm erschte Himmel wöre,
Doa wör öck möd on afgehetzt
On föhld een manschlich Röhre.
De leewe Engel föhrte mi
An eene Himmelsluke
On säd: "Min Fründ, doa kannst du di
Ganz onschenört hänhucke."
On wie öck doa herunnerkick,
Groad onder mine Feete
Seh öck an minem Sarge glick
So manche Fründe bede.
On weil se dort för mine Seel
So trurig bede dohne,
Bödd öck dem Engel Gabriel:
"Loat mi wo annersch goahne!"
He oawer säd: "Nu sett di doal
On doh nich soväl rede;
Se hebbe di so manchetmoal
Öm Läwe ock beschäte!"
Aus:"Kuddelmuddel" von Daniel Staschus
zum Gedichtverzeichnis
|