De Ermländer önn Königsberg
Von Wilhelm Reichermann
Een Heilsberger, wo moal noa Kensbarg köhm,
Besocht sien Frund onn undernöhm
Met de e Börreis dörch de Stadt,
Besöch seck ditt, besöch seck dat.
E half Schock Kneipe wat besocht,
Am Vöhmarkt da wurd angefange
Onn eher gäwe se nich Bocht,
Bet opp de Hoowe se gelange.
Se moake dörch de Stadt de Runde,
Doch ganz glickväl, wo se seck ook befunde,
De Körl, de Ermländer, de hadd
An allem uttosette wat;
Onn he behaupt ganz stief onn fest:
"Nai, Königsberg, das sai e raines Nest !
Da kommt emal nach Hailsberg hin,
Da sai e aingeres läbe drin !
Auch hier der Pregel, nai das sag ich Aich,
Nai, gege unse All', da sai das kain Verglaich !
Und auch hier all de Kirchetürm,
Die saie gege unsem raine Regewürm !"
So praahld he Heilsberg onn genoog,
Sien Voaderstadt de höl he hoch.
Ook wie se köhme opp de Hoowe,
Blöf he ganz fest bie sienem Gloowe,
Önn Heilsberg wör dat aller schöner,
Onn Gras onn Loof wör dotte gröner.
Onn ook de Böhm, so väl wör söcher,
De wöre dott bedeitend höcher;
Ook de Mergelles wöre fetter,
De Schorrschtenfegersch wöre schwatter,
Dat Woater, dat wör dott väl natter,
De Seidel wöre ganz bedeitend grätter
Onn denn dat Bör von Wöckboll onn Ponarth,
Dat, meent he, schmeckt em so appart;
Önn Heilsberg, dat von Sankt Georg
Ging bäter dörch e Gorgel dorch.
Ne, ne, dat Königsberger Bör
Dat schmeckt em ganz onn gar nich mehr,
Onn doch drunk he met Ach onn Weh
E Achtel ut so pö a pö.
Onn twöschenönn da drunk he noch
So manchet stiewe Tulpke Grog;
Sien Gorgel wär good utgeblecht
Onn tapfer wurd dropp losgezecht.
Doch schließlich kröch he doch genoog,
Moakt opp e Weg seck önn e Kroog;
Sien Fründ natürlich ömmer met,
De ganz Gesellschaft wör ömm Trött.
Onn wie se läng e Stöndamm goane,
Da sitt de Heilsberger en Mond am Himmel stoahne.
Stöll blöfft he stoahne opp e Gass,
"Herrjeh !" sächt he, "was sai doch das?
Das soll gewiß hier Aier Mondche sain?
0 Joseph, was sai hier der Mondche klain !
Bai Aich da sai auch garnuscht los !
Bei uns in Heilsberg sai der Mondche noch emal so groß !"
zum Gedichtverzeichnis
|