Dat full em up !
Von Wilhelm Reichermann
Ömm Kroog wör grootet Danzvergnöge
Onn hindenoa noch Prögelie,
Wo väle blaue Ooge kröge.
Onn wie de Schlacht denn wör värbie,
Wie jeder hadd sien Fett gekräge,
Hefft de Mergell biem Stoaw utfege
E half Schock Backtähn oppgelese.
So wiet öss dat nich schlömm gewese,
Wie Prögel stets dato gehöre,
Wenn opp em Land seck amesöre.
Sowiet wör aller schön onn good,
Man leider, de een Körl wör dood;
De Schädel wör em ganz geknöckt,
Drömm wurd et ganze Därp verröckt.
Dem Knecht, wo em hadd doodgeschloage,
Dem kröch nu et Geröcht biem Kroage,
Dem wull nu de Herr Staatsanwalt
Versorge önn e Stroafanstalt,
Onn he beandroagt biem Geröcht,
Dat he dafär to sötte kröcht.
Genoog, de Spoaß wör nich mehr schön!
Värm Schwurgericht önn Bartensteen
Da wurde Zeige väl vernoahme;
Ook Kruse Lipp öss värgekoame,
De musst dott ook als Zeig nu vär,
Weil he dabie gewäse wör.
Jedoch vom Schloane onn vom Stöte,
Da wull Luus-Kruse Lipp nuscht weete.
He sächt: "Eck wör zwar ook damank,
Doch weet eck mie nuscht to besönne,
Acht Doag lang lög ömm Bedd eck krank,
Säss Löcher hadd em Kopp eck bönne,
Mien Dätz wör dicht be dicht voll Wunde
Onn mien Gedanke sönn geschwunde;
De Marks öss mie davon geröhrt
Onn eck sie nu so half gestört."
De Präsedent vermoahnt em nu:
"Mein lieber Sohn, hör jetz 'mal zu !
Vor einem Meineid hüte dich !
Sonst kommst ins Loch ganz sicherlich.
Erzähle jetzt, was du geseh'n,
Als dieser Totschlag ist gescheh'n. -
Was fiel, mein Sohn, dir im Verlauf
Der Schlägerei am meisten auf ?"
"Wat mie da oppfull?" sächt de Lipp,
"Sonst nuscht, blos wie eck so e Hipp
Kröch met e Rung äw miene Kopp,
Dat full mie opp !"
zum Gedichtverzeichnis
|