De Glockes
von Daniel Staschus
Also säd de ohle Kruse:
"Oape könne mi fohrts luse,
Wenn öck sulld ön minem Läwe
Eenem Schnaps mi loate gäwe!"
Bool danoah, am sölge Morge
Wull he ihligst söck besorge
Ut de grote Stadt am Pregel
Schlorre, Schniefke on poar Nägel.
On so gung he los, ganz sachte,
Wie 'ne loahme Wanz on dachte
Ömmerto on sin Verspräke,
Dat he nömmermehr wull bräke.
Bi de erschte Schnapsdestille
Wankte schon sin fester Wille,
Denn wo volle Flasche blinke
Zeigt söck ok de Lost tom Drinke.
On he kickt söck an dem Bitter,
Dem Machandel, Akvawitter,
Kümmel, Konjack, Rum, Steinhäger,
Bärefang on Gorgelfeger.
Doa erklung ganz fien on helle
Von de kleene Betkapelle
Een goar leeflichet Gebimmel:
Kümmel, Kümmel, Kümmel, Kümmel!
Doch de ohle browe Bur,
Köm em dat ok noch so suur,
Lenkte dennoch sine Schrötte
Wieder noah de Grotstadt Mötte.
Bool kun he nu nich mehr goahne,
On so blöw he noch moal stoahne,
Wo all wedder sine Blicke
Bannte eene Schnapspudike.
On et funge an to lüde
Vorn on hind, von alle Siede:
Drink e Bummke, drink e Bummke,
Kümmel Konjak oder Rumke.
Nu wurd onder sinem Hoote,
Em ganz dammelig to Moote,
Sölwst sin nüer Gummikroage
Moakde em väl Onbehoage.
Jankernd noah dem Labedroppe
Ös he ön de Klurk gekroape
On heft dort söck good beschworke.---
Ei woarum op Glockes horche!
Aus:"Kuddelmuddel" von Daniel Staschus
zum Gedichtverzeichnis
|