Kleen Hanselke
Daniel Staschus
Noch schwach wör oppem Diek dat Ihs.
Kleen Hanselke, recht näsewies,
Probörte moal op sine Schlorre
Doasölwst e bätke romtoschorre.
Doa föl mät eenemoal he hän
On plumps, wör he öm Woater bönn,
Doch krabbelte, wie eene Fleege,
He söck herut bool up dat Dreege.
On natt, wie eene Woatermuus
Leep Hanselke, heidi! noah Huus
On fung ut groter Angst vor Haue
To griene an on to karwaue.
Doch Muttke säd: "Si stöll, min Sähn,
On dank dem leewe Gottke scheen,
Dat he gereddet heft din Läwe
On sinen Biestand di gegäwe."
Doa säd doarop de kleene Hans:
"Ach Mutterke, dat stömmt nich ganz.
De leerwe Gottke leet mi zapple,
Mussd ut dem Ihs alleen rutkrabble!"
Aus: "Kuddelmuddel" von Daniel Staschus
zum Gedichtverzeichnis
|