Suhre Komst
von Franz Nèe
Wenn de Wintrung tojeseegt
On de Bur all Rigges pleeg -
Wenn de kole Winde blaose
On de Jäger schött op Haose -
Wenn öt Wetter natt on schubbrig,
On de Mönsche ward so hubbrig;
Weetst - denn jankert onse Bure
All nao Komst, nao ährem suhre.
On de Komsttonn, schwaor on mächtig,
(Watt dao röngeiht, öß beträchtig)
Ward möt Suhrdeeg utgeschmärt,
Dat de Komst man dichtig gährt.
Oenne Komsttonn - fein tärschnäde -
(Schtrinke ware nich geläde)
Möt dem Sturgel, dat so bomst,
Stampt de Vaoder sienem Komst,
Dat de Sopp nao baowe schläckert
On dem Bur sien West bekleckert,
Dat de Schwitz äm runner kullert;
He wärgt rön, dat man so bullert.
Komst mott ware, wie he soll;
On so ward de Komsttonn voll.
Nao paor Daogkes deit'r suhre,
On denn freie sich de Bure.
Suhre Komst - ei dat öß e Fräte!
Schättelwies ward he gegäte
Möt gekaokde Reekerfleesch,
Ook to Flinse, brun on reesch,
On - watt wol e jeder weet -
Möt geschlachte Schwien ähr Feet.
Häst die bößke äwerfräte,
Von dem Komst to vähl gegäte,
Dat die önnerlich so bullert,
Oenne Därmels quarrt on kullert,
Schaod nuscht, geiht vorräwer bool:
Dat's gesund on göwt ook Stool.
Doch, dat Du nich kömmst to Schaode,
Micht öck die bloß eenet raode;
Hölst am suhre Komst die ran,
Rer kein Bottermälk nich an.
Weetst - de Bottermälk, dä dröwt,
Oeß möt suhre Komst wie Göft.
Deist die sowat angewänne,
Weetst - denn kannst bloß ömmer ränne;
Häst dem ganze Dag to liede -
Brölle kannst Du von dem Schniede.
Quelle:"Tom Schewlache", von Franz Nèe,
erschienen 1928, Pillkallen, Verlag Morgenroth
zum Gedichtverzeichnis
|