Duke oppem Markt
Daniel Staschus
To eenem Bur säd moal sin Fruke
Det morgens fröh" "Na Duke, Duke,
Hörst du denn nich? Et ös all spät,
So stoah doch op, du fuler Krät!
Du wullst doch hiede fröh opstoahne,
Noah Keenigsbarg möt Botter goahne,
On möt de Eier oppem Markt!"
Doch Duke röhrt söck nich on schnarkt.
Nun nöhm se, ohne väl to froage,
Em biem Schlafittke on biem Kroage
On treckt em ut de Hotz herut,
Bit Kopp on Beene wöre but.
On een, twei, drei, ön korter Wiele
Packt se tosamm möt groter Ihle
Dem allergrötste Marktkorw voll,
Wat alles he verkeepe soll.
Goar väle, väle Punde Botter,
Scheen öngewickelt önnem Kodder,
Schock Eier on e ohle Hänn
Önn sinem Korw on Löschke rönn.
Se göw em möt ok goode Lehre,
Dat he man bloß nich soll anschmäre
Söck loate von den schlechte Lied;
Denn falsch on gnietsch sönd alle hied.
On soll söck loate good betoale
Von disse Stadtlied, de so proahle,
Söck pörsche on söck dohne grot
Bi disser Läwensmöddelnot.
So moakde he söck op de Klömpe,
Ganz sachte, timpe, timpe, timpe,
Öm Mul de Piep ut Purzelloan
Möt eenem schwarte Bommel dran.
On als he endlich angekoame
Wör oppem Markt, gliek hebbe Doame
On andre Wiewersch em omröngt
On goar von alle Sied bedrängt.
Se hebbe söck om em geräte.
Doch als de Pries to hoch bemäte,
On onverschämt köm allen vär,
Doa holten se dem Sipo her.
De säd tom Bur: "Ich muß Sie bitten,
Da sie den Marktpreis überschritten,
Mit mir zum Marktgericht zu gehen!
Nun vorwärts marsch! Ich bitte schön!"
Dem Fruke wör de Tied so lange
On mußde emmerto söck bange
Noah ährem leewe Dukemann,
Dem se goar nicht erwachte kann.
"Nu ös he fort drei volle Doage,
Ach nee, ach nee, wat öck for Ploage
Möt dissem Mann erläwe mat! -
Dem loat öck nochmoal ön de Stadt!"
On als det Oawends spät om näje
De Duke köm, doa reep entgege
Von Wiedem schon de leewe Frau:
"Wo best so lang gewese du?
Nu segg mi ok, wat häst gekräge?"
Doa säd de Duke ganz verlege:
"Dreihundert Mark, on denn ok noch,
Wat mi am dollste kränkt, drei Doag!"
Aus: "Kuddelmuddel" von Daniel Staschus
zum Gedichtverzeichnis
|