Mehr wie Du!
Von Wilhelm Reichermann
Twö Junges hodde Schwien onn Schoap
Onn Pörd onn Osse all tohoop;
De Ener dönt biem Hille,
De Anderer biem Schwille.
De örschter, de heet Gottlipp Kruus
Onn wör ut Kawere tohuus.
De Zweiter hadd e Mutter zwar,
So väl stund fest, und wör ganz klar,
Doch hiedges Doags noch keiner weet,
Wie egentlich sien Voader heet.
Sien Mutter, dat wör Fried gewennt,
Wurd kortweg "de ohl Mien" genennt;
Se mußt en Fried all frög vermöde
ömm em to fodre onn to kleede. -
Diss Junges also tom Vergnöge
Biem Höde juche se onn kröge,
Onn dat et noch väl schöner klunk,
Da schloane se seck undre Schlunk
Onn späle danoa metenander
Mit ähre Kniefs dat Spöll "Kluwander"
Onn broade opp e Schötelfahr
Seck underdess Kurtoffle gar.
Onn Pörd onn Vöh de goane äwer
Opp Noaber Joap-Wölk siene Klöwer. -
De Junges pröckle önne Örd
Onn froage väl noa Vöh onn Pörd,
Onn goane Schoap onn Schwien toschoade,
De Hauptsach öss Kurtoffle broade!
Onn platzt de Oss ook utenander:
Se späle ömmerzu "Kluwander".
Toletzt kömmt bie dem Spöll dat ran:
"Wer nu sien Lochke decke kann",
De Fried gewunn bie dissem Spähl,
He hadd e Pungel örd toväl
Onn schmet, so wie seck dat gehört,
Dem Lippe an e Kopp de Örd.
Luuskruse Lipp, de wat nu schlömm,
Schriet vär dem Fried önn sienem Grömm:
"Na weetst ook Fried, recht egentlich,
Häst Du moal keine Voader nich!"
Fried sacht: "Kein Voader ?! - Wat öss nu? -
Du Schoapskopp! - Am End mehr wie Du!"
Aus: "STARKER TOBBAK"-
Eine Auslese der besten Plattdütschen Spoaskes
aus den 11 Bänden "Ut Noatange".
Gräfe und Unzer Verlag München
zum Gedichtverzeichnis
|