Am Telephon
Von Wilhelm Reichermann
De Holthändler, Herr Lewensohn
Önn Memel, steiht am Telephon,
Wo henn opp siene Holtplatz geiht,
Onn froagt em ohle Moddrigkeit,
Wo dott önn Schmelz de Oppsöcht föhrt:
"Is dort was Naies gepessiert?"
De Moddrigkeit war däg ömm Troan,
Hadd seck e bät de Näs begoate,
Onn stoamert da so wat vom Koahn,
Wo he voll Holt wull loade loate.
De Tung, de stodd dem goode Mann
Dabie ganz mördermäßig an,
Se ging, wie man so sächt, "opp Schlorre".
De Lewensohn am Telephon
Versteiht ook nich een Woort davon,
He hört en Moddrigkeit blos gnorre.
"Mir schaint", so schriet he em önn't Ohr,
"Sie sind schon wieder mal im Schmoor!
Ich sage Ihnen das ganz offen:
Sie sind ja wie e Aff besoffen!"
Dem Moddrigkeit dem ärgert dat,
"Besoape?" schriet he trügg, "von wat?!
Wat eener aller mott terläwe,
Na, hebbe Se mie wat gegäwe?!
Eck hebb noch hiede keine Funke,
Noch keine ihnzge Schnaps gedrunkel"
"Na, na, Sie können das nicht streiten!
Durchs Telephon riech' ich's von weiten,
Daß Sie nach Korn und Kümmel stinken,
Von dem zwei Stof Sie täglich trinken!"
"Na, so wat!" brommt dropp Moddrigkeit,
"Wat dat doch eenem koddrig geiht;
Eck docht, dat Dings wör blos tom höre,
Nu mott eck mie toletzt beköhre!
Nu röckt de Herr all Korn met Kämel
Per Telephon von Schmelz bet Memel!"
Aus: "STARKER TOBBAK"-
Eine Auslese der besten Plattdütschen Spoaskes
aus den 11 Bänden "Ut Noatange".
Gräfe und Unzer Verlag München
zum Gedichtverzeichnis
|