De Wecker
Von Ruth Geede
De ole Juste mussd emoal -
Et war vär lange Joahre -
To ehre groote Seelequal
Tom Stadtgericht henfoahre.
De Zug fohr morgens gegen veer -
De Ole schömpd on flookde,
Denn wo se schleep wien Murmeldeer,
Se eenem Wecker brukde.
Von Pontius to Pilatus rennd
Se nu möt ehre Sorge,
Kein Mönsch, wohenn se sik ook wennd,
kunnd ehr e Wecker borge.
De Ole käm em grootem Zorn,
Fung sacht all an to roase,
De Kohhert lacht: "Möt minem Horn
war eck di helpe bloase.
Doch si man stöll, loop fix on flink
Man tom Aptheker Becker,
De hefft bestömmt, wi eck mi denk,
tohus e Klingerwecker!"
De Herr Aptheker schmunzelnd säd:
"Joa, joa, he deid good roahre,
He weckt di sicher nich to späd,
Dat enne Stadt kannst foahre!"
De Ole waschd sik Koop on Feet
On leggd sick ruhig schloape,
Noch eenmoal se am Schruwke drejd:
"De wart to Tiet mi roape!"
Opp eenmoal wär de Juste woak,
War bold var Schreck gebleewe,
dorcht Fönster schien de helle Dach,
De Seeger wiesd opp sewe!
De Ole kreeg e rodem Kopp,
Möt Wecker on Gejoammer,
Möt Underrock on Bammelzopp
Scheesd se ut ihre Koammer.
Se roasd to dem Aptheker schnell,
Wie wulld se stracks varrecke,
On fauchd em an möt groot Gebröll:
"Dat Oas deid mi nich wecke!"
Herr Becker, de bleffd ruhevoll:
"Noa joa, he es bi Joahre!
Wenn ons ol Wecker klingre sull,
mott he geschödderd warre!"
Aus: Ruth Maria Wagner "Luntrus und Marjellchen",
Verlag Gerhard Rautenberg, Leer
zum Gedichtverzeichnis
|